ᐱᓕᕆᐊᒥᑦ ᐱᕚᓪᓕᕈᑏᑦ
ᓄᓇᓕᖕᓂ ᐱᓕᕆᖃᑎᖃᕐᓃᑦ ᐊᒻᒪ ᐃᖅᑲᓇᐃᔮᒃᓴᑦ
ᐹᕙᓐᓛᓐᑯᑦ ᑲᑎᑉᐸᓪᓕᐊᔪᓂᒃ ᐊᑭᓖᓯᒪᓕᖅᑐᑦ ᐅᖓᑖᓄᑦ $164 ᒥᓕᐊᓐ ᑮᓇᐅᔭᑎᒍᑦ ᐃᑲᔫᓯᐊᓂᒃ ᕿᑭᖅᑕᓂᒥᐅᓄᑦ ᐃᓄᖕᓄᑦ, ᐊᑐᐃᓐᓇᕈᐃᓯᒪᓪᓗᑎᒃ ᐅᖓᑖᓂ $150 ᒥᓕᐊᓐ ᑮᓇᐅᔾᔭᒃᓵᑎᒍᑦ ᐃᓄᖕᓄᑦ ᐃᖅᑲᓇᐃᔭᖅᑎᓄᑦ ᑳᑐᓛᒃᑕᐅᓯᒪᔪᓄᓪᓗ, ᑎᑭᐅᑎᓪᓗᑎᒃ ᐅᖓᑖᓄᑦ $1.79 ᐱᓕᐊᓐ ᑳᓐᑐᓛᑦ ᑐᓂᔭᐅᔪᑦ ᐃᓄᖕᓂᑦ ᓇᖕᒥᓂᕆᔭᐅᔪᓄᑦ, ᐊᑐᐃᓐᓇᕈᐃᓯᒪᓪᓗᑎᒃ ᐅᖓᑖᓂ $3.8 ᒥᓕᐊᓐ ᐊᑐᖅᖢᒋᑦ ᑮᓇᐅᔭᖃᖅᑎᑦᑎᓃᑦ ᑐᓐᓂᖅᑯᓯᐊᓄᓪᓗ ᐱᓕᕆᐊᖅ, ᑕᑯᓯᒪᓪᓗᑕ ᐅᖓᑖᓂ 650 ᐃᓕᓐᓂᐊᕌᓂᒃᑐᑦ ᐃᖅᑲᓇᐃᔭᓯᒋᐊᖅᑳᖅᑎᓐᓇᒋᑦ ᐃᓕᓐᓂᐊᒐᒃᓴᓂᒃ, ᐊᒻᒪ ᐃᓕᓐᓂᐊᖅᑎᑦᑎᓯᒪᓪᓗᑎᒃ 229,000 ᐃᑲᕐᕋᓂᒃ ᐃᓕᓐᓂᐊᖅᑎᑦᑎᓂᕐᒥᒃ ᐃᓄᖕᓄᑦ ᐃᖅᑲᓇᐃᔭᖅᑎᑐᓄᑦ, ᐊᓯᖏᓐᓗ ᐃᓅᓰᑦ-ᒪᑭᒪᔾᔪᑎᓄᓪᓗ ᐱᕚᓪᓕᕈᑎᒃᓴᑦ.
ᐊᕙᑎᒧᑦ ᐱᕚᓪᓕᕈᑏᑦ
ᐊᒥᓱᑦ ᐊᕙᑎᓕᕆᓂᕐᒧᑦ ᐊᑲᐅᔾᔪᑏᑦ ᓴᖅᑭᓐᓂᐊᖅᑐᑦ ᐊᑐᖔᓕᖅᑎᓪᓗᒋᑦ ᓄᓇᓯᐅᑎᓅᕈᓐᓃᕐᓗᑎᒃ ᓄᓇᓯᐅᑎᑯᑖᑉ ᐊᖅᑯᑎᑯᑖᖓᒎᓕᕐᓗᑎᒃ ᐅᓯᑲᖅᑕᕐᓃᑦ, ᐱᖃᓯᐅᑎᓪᓗᒋᑦ ᐱᓗᐊᕈᓐᓃᖅᑎᑦᑎᓗᑎᒃ ᑕᒪᐃᓐᓂᒃ ᓄᓇᕐᔪᐊᒥ ᐅᖅᑰᓯᕙᓪᓕᐊᔪᑎᓂᒃ ᐊᒻᒪ ᐳᔫᙱᓐᓂᖅᓴᐅᓕᕐᓗᓂ ᐅᓯᑲᖅᑕᖅᑏᑦ ᐊᖅᑯᑖᓂ. ᐊᒻᒪᓗᑦᑕᐅᖅ, ᐹᕙᓐᓛᓐᑯᑦ ᐊᐅᓪᓚᖅᑎᑦᑎᖃᑦᑕᕈᓐᓃᕋᔭᖅᑐᑦ ᓴᕕᒃᓴᓂᒃ ᕿᙳᐊᒍᑦ, ᓴᖅᑮᓂᐊᖅᖢᓂᓗ ᓴᓇᕝᕕᐅᔪᒥ ᐊᐅᓪᓚᖅᑎᑦᑎᓂᕐᒧᑦ ᐱᓕᕆᙱᓐᓂᖅᓴᐅᓕᕐᓗᑎᒃ ᐅᑕᖅᑭᔭᐅᔪᒥ ᑕᓪᓗᕈᑎᐅᑉ ᐃᒪᖓᓂ ᑲᓇᑕᒥ ᐃᒪᕐᒥᐅᑕᓂᒃ ᔭᒐᐃᑦᑕᐃᓕᒪᕝᕕᐅᔪᒥ (TINMCA).
ᑖᒃᓰᔭᐃᔾᔪᑏᑦ ᐊᒻᒪ ᑮᓇᐅᔭᑎᒍᑦ ᐱᕚᓪᓕᕈᑏᑦ
ᐹᕙᓐᓛᓐᑯᑦ ᒥᒃᓴᐅᓴᐃᓯᒪᔪᑦ ᑲᑎᖢᒋᑦ ᐊᑭᖏᑦ ᑮᓇᐅᔭᑎᒍᑦ ᐱᕚᓪᓕᐅᑕᐅᔪᓂᒃ, ᐃᓄᖕᓄᐊᕋᔭᖅᑐᑦ ᓄᓇᕗᒻᒧᓪᓗ ᐅᔭᕋᖕᓂᐊᕐᓂᓗᒃᑖᖏᓐᓂᒃ ᓄᓘᔮᖕᓂ ᐱᓕᕆᐊᒥᑦ (ᐱᖃᓯᐅᑎᓪᓗᒍ ᐃᒃᐱᑭᑦᑐᕐᔪᐊᓄᑦ ᓄᓇᓯᐅᑎᑯᑖᒃᓴᐅᑉ ᐊᖅᑯᑎᑯᑖᒃᓴᖓ), ᐅᖓᑕᐅᔾᔨᓯᒪᓂᐊᖅᑐᑦ $5 ᐱᓕᐊᓐ ᑲᓇᑕᒥ ᑮᓇᐅᔭᑦ ᒪᓕᒃᖢᒋᑦ ᐊᑭᓕᐅᑕᐅᓪᓚᑦᑖᕐᓂᐊᖅᑐᑦ ᒐᕙᒪᖏᓐᓄᑦ ᓄᓇᕗᒻᒥ ᑲᓇᑕᒥᓗ, ᐊᒻᒪ ᐃᓄᐃᑦ ᑎᒥᖁᑎᖏᓐᓄᑦ, ᐱᖃᓯᐅᑎᓪᓗᒋᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪ ᓄᓇᕗᑦ ᑐᙵᕕᒃ ᑎᒥᖁᑖᓄᑦ, ᐊᒻᒪᓗᑦᑕᐅᖅ ᐅᖓᑖᓂ $1 ᐱᓕᐊᓐ ᑲᓇᑕᒥ ᑮᓇᐅᔭᑦ ᒪᓕᒃᖢᒋᑦ ᐊᑭᓕᐅᑕᐅᓪᓚᑦᑖᕐᓂᐊᖅᑐᑦ ᐃᓄᖕᓄᑦ ᐃᖅᑲᓇᐃᔮᑎᒍᑦ ᓄᓘᔮᖕᓂ ᐱᓕᕆᐊᒥ
ᑲᓇᑕᐅᑉ ᐱᔪᓐᓇᕐᓂᖃᕐᕕᖓ ᐅᑭᐅᖅᑕᖅᑐᒥ
ᐱᓕᕆᐊᖅ ᐃᑲᔪᕐᓂᐊᖅᑐᑦ ᓴᙱᒃᑎᒋᐊᕐᓗᒋᑦ ᑲᓇᑕᐅᑉ ᐱᔪᓐᓇᕐᓂᖃᕐᕕᖓᓂᒃ ᐅᑭᐅᖅᑕᖅᑐᒥ ᓴᐳᔾᔨᓯᒪᓂᒃᑯᑦ ᑲᓇᑕᐅᑉ ᐊᕙᑎᖓᓂ ᐃᑦᑕᕐᓂᓴᓕᕆᓂᖅ, ᐱᔪᒥᓴᐃᓂᖅ ᒪᑭᒪᔾᔪᑎᑎᒍᑦ ᐊᒻᒪ ᐃᓄᖕᓄᑦ ᐱᕙᓪᓕᐊᓂᕆᔭᐅᔪᖅ ᓄᓇᖓᓂ, ᐊᒻᒪ ᐱᐅᓯᒋᐊᖅᑎᓪᓗᒋᑦ ᐅᑭᐅᖅᑕᖅᑐᒥ ᐊᐅᓚᑦᑎᔾᔪᑕᐅᔪᑦ.
o ᐱᓕᕆᐊᖅ ᐱᕙᓪᓕᐊᑎᑦᑎᓂᐊᕐᒥᔪᖅ ᖁᑦᑎᒃᑐᒥ ᐅᑭᐅᖅᑕᖅᑐᒥ ᑐᐊᕕᕐᓇᖅᑐᓕᕆᔪᓐᓇᕐᓂᖅᓴᐅᓂᕐᒥᒃ ᐊᒻᒪ ᐊᑐᐃᓐᓇᐅᑎᑦᑎᓗᑎᒃ ᐊᑐᖅᑕᐅᓇᔭᖅᑐᒥᒃ ᑲᓇᑕᒥ ᓯᑯᓯᐅᓯᕆᔨᒃᑯᓐᓄᑦ ᑲᓇᑕᒥᓗ ᐅᓇᑕᖅᑐᒃᓴᓄᑦ.