ᐊᐱᖅᑯᑕᐅᒐᔪᒃᑐᑦ

ᖃᓄᐃᒻᒪᑦ ᑖᓐᓇ ᐃᓂ ᓂᕈᐊᖅᑕᐅᓯᒪᕙ ᐃᒃᐱᑭᑦᑐᕐᔪᐊᓄᑦ ᓄᓇᓯᐅᑎᑯᑖᒃᓴᐅᑉ ᐊᖅᑯᑎᑯᑖᒃᓴᖓᓄᑦ?

ᓇᓃᓐᓂᖓ ᐃᒃᐱᑭᑦᑐᕐᔪᐊᓄᑦ ᓄᓇᓯᐅᑎᑯᑖᒃᓴᐅᑉ ᐊᖅᑯᑎᑯᑖᒃᓴᖓ ᖃᐅᔨᓴᖅᑕᐅᕐᔪᐊᖅᓯᒪᔪᖅ ᐊᒻᒪ ᐱᕙᓪᓕᐊᑎᑕᐅᓯᒪᓪᓗᓂ ᐹᕙᓐᓛᓐᑯᓐᓂ ᑐᙵᕕᖃᖅᖢᑎᒃ ᐊᒥᓱᕐᔪᐊᓂᒃ ᐅᖃᐅᓯᒃᓴᐅᓯᒪᔪᓂᒃ ᐅᖃᐅᔾᔨᒋᐊᕈᑎᓂᓪᓗ ᑐᓴᖅᑎᑦᑎᔾᔪᑕᐅᓯᒪᔪᑦ ᐃᓄᖕᓂᑦ, ᐃᓄᐃᑦ ᑎᒥᖁᑎᖏᓐᓂᒃ, ᓄᓇᓕᖕᓂ, ᐊᒻᒪ ᓄᓇᕗᒻᒥ ᒐᕙᒪᑐᖃᒃᑯᓐᓂᓗ ᑭᒡᒐᖅᑐᐃᔨᓂᑦ. ᓇᓃᓐᓂᖓ ᐃᒃᐱᑭᑦᑐᕐᔪᐊᓄᑦ ᓄᓇᓯᐅᑎᑯᑖᒃᓴᐅᑉ ᐊᖅᑯᑎᑯᑖᒃᓴᖓ ᓂᕈᐊᖅᑕᐅᓯᒪᔪᑦ ᐹᕙᓐᓛᓐᑯᓐᓂ ᒪᓕᒃᖢᑎᒃ ᓇᓗᓇᐃᔭᑦᑎᐊᖅᓯᒪᒧᓂᒃ ᕿᒥᕐᕈᓂᕐᓂᒃ ᐊᒥᓱᒐᓚᖕᓂᑦ ᐃᓂᐅᔪᓐᓇᖅᑐᓂᒃ, ᐊᒻᒪ ᑭᖑᓂᐊᒍᑦ ᐃᓄᓕᒫᓂᒃ ᑲᑎᒪᖃᑎᖃᖃᑦᑕᕐᔪᐊᖅᓯᒪᓚᐅᖅᑎᓪᓗᒋᑦ. ᓈᒻᒪᓛᖑᔪᖅ ᐃᓂ ᓲᖃᐃᒻᒪ ᐃᒪᐃᓐᓂᖓᓄᑦ:

1. ᑐᑭᓕᐊᓛᖑᓪᓗᓂ ᓈᒻᒪᓛᖑᔪᖅ ᑐᓚᒃᑕᕐᕕᒃᓴᐅᑉ ᐃᓂᒃᓴᖓᓄᑦ, ᐊᑐᓗᐊᙱᑎᑦᑎᓪᓗᓂ ᐃᓂᒃᓴᖓᓂ ᐱᓕᕆᐊᑉ.
2. ᐊᒃᑐᐃᓗᐊᙱᑎᑦᑎᔪᖅ ᐊᒃᑐᐃᓂᐅᑐᐃᓐᓇᕆᐊᓕᖕᓂᒃ ᐊᒻᒪ ᐸᒡᕕᓴᐃᓗᐊᙱᑎᑦᑎᓪᓗᓂ ᓄᓇᖓᑕ ᓄᓇᖓᓂᒃ, ᓂᕐᔪᑎᖏᓐᓂᒃ, ᐃᓄᐃᓪᓗ ᐊᑐᖅᐸᒃᑕᖏᓐᓂᒃ ᓄᓇᓂᒃ,
3. ᑲᒪᒋᔭᖃᖅᑐᑦ ᐱᔪᒥᒋᔭᐅᔪᓂᒃ ᐃᓱᒫᓘᑕᐅᔪᓂᓪᓗ ᓄᓇᓕᖕᓂ, ᐃᓄᖕᓂᑦ, ᐃᓄᐃᑦ ᑎᒥᖁᑎᖏᓐᓂᒃ, ᓄᓇᓕᖕᓂ ᑎᒥᐅᔪᓂᑦ, ᐊᓯᖏᓐᓂᓪᓗ ᓄᓇᐅᔪᓂ, ᐊᒻᒪᓗ
4. ᓈᒻᒪᓛᖑᓪᓗᓂ ᓄᓇᖓᑕ ᖃᓄᐃᓕᖓᓂᖓ ᐃᑲᔪᕈᓐᓇᖅᖢᓂ ᐊᑦᑕᕐᓇᙱᒃᑐᒃᑯᑦ ᐊᒻᒪ ᐊᑑᑎᖃᑦᑎᐊᖅᑐᒧᑦ ᓄᓇᓯᐅᑎᑯᑖᑉ ᐊᖅᑯᑖᓂ ᐊᐅᓚᓂᕐᓄᑦ.

ᖃᖓ ᑐᑭᓯᑎᑦᑎᕙᓪᓕᐊᓚᐅᖅᐱᓯ ᓄᓇᓕᖕᓂ ᐱᕙᓪᓕᐊᑎᑦᑎᔪᒪᓂᔅᓯᓐᓄᑦ ᐃᒃᐱᑭᑦᑐᕐᔪᐊᓄᑦ ᓄᓇᓯᐅᑎᑯᑖᒃᓴᐅᑉ ᐊᖅᑯᑎᑯᑖᒃᓴᖓᓂᒃ?

ᓄᓘᔮᖕᓂ ᐱᓕᕆᐊᖅ ᐱᔾᔪᑕᐅᖃᑦᑕᖅᓯᒪᔪᖅ ᐊᒥᓱᕐᔪᐊᓄᑦ ᐊᒻᒪ ᑲᑎᒪᖃᑎᖃᖃᑦᑕᐃᓐᓇᕐᓂᕐᒥ ᐅᖓᑖᓂ 18 ᐊᕐᕌᒍᑦ. ᑲᑎᒪᖃᑎᖃᖃᑦᑕᕐᓃᑦ ᓄᓇᓕᖕᓂ ᐱᒋᐊᓚᐅᖅᑐᑦ 2006-ᒥ ᐱᓕᕆᐊᒥᒃ ᐸᕐᓇᐃᓂᐅᓪᓗᓂ, ᓴᓇᐅᒪᓂᒃᓴᕐᓄᑦ ᐊᒻᒪ ᐱᕙᒌᔭᖅᑕᐅᓕᖅᑎᓪᓗᒋᑦ ᓄᓘᔮᖕᓂ ᐊᕙᑎᒥᒃ ᐊᒃᑐᐃᓂᕐᒧᑦ ᐅᓂᒃᑳᑦ ᐱᒋᐊᖅᑕᐅᓕᖅᑎᓪᓗᒋᑦ. ᑭᖑᓂᐊᒍᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂ ᕿᒥᕐᕈᔭᐅᕙᓪᓕᐊᓯᒋᐊᖅᖢᑎᒃ ᐃᓚᐅᓪᓗᑎᒃ ᐊᒥᓱᑦ ᐃᓄᓕᒫᓂᒃ ᓈᓚᖕᓂᖃᖅᑎᑦᑎᓃᑦ ᐊᓯᖏᓪᓗ ᑲᑎᒪᓂᕐᒧᑦ ᐱᕕᒃᓴᐅᓯᒪᔪᑦ ᑲᑎᙵᐅᖅᑐᑦ ᓲᕐᓗ ᒐᕙᒪᑐᖃᒃᑯᑦ, ᓄᓇᕗᒻᒥ ᒐᕙᒪᒃᑯᑦ ᐊᒻᒪ ᓄᓇᓕᖕᓂ ᒐᕙᒪᒃᑯᓐᓄᑦ ᑭᒡᒐᖅᑐᐃᔩᑦ, ᐃᓄᐃᑦ ᑎᒥᖁᑎᖏᑦ, ᓄᓇᓕᖕᓂ ᑭᒡᒐᖅᑐᐃᔩᑦ, ᐃᓄᑐᖃᑦ, ᒪᒃᑯᒃᑯᑦ ᐊᒻᒪ ᐃᓚᒋᔭᐅᔪᑦ ᑭᒃᑯᑐᐃᓐᓇᕐᓄᑦ, ᑐᓴᖃᑎᒌᒍᑎᖃᕈᓐᓇᖅᓯᒪᔪᑦ ᐃᓱᒪᒋᔭᖏᓐᓂᒃ ᐊᒻᒪ ᐃᓚᐅᓗᑎᒃ ᑐᑭᑖᖅᑎᑕᐅᑦᑎᐊᖅᓯᒪᔪᑎᒍᑦ ᐅᖃᖃᑎᒌᖕᓂᖅᑎᒍᒍᑦ ᑕᒪᑐᒧᖓ ᐊᒃᑐᐃᓂᐅᑐᐃᓐᓇᕆᐊᓕᖕᓄᑦ ᐃᒃᐱᑭᑦᑐᕐᔪᐊᓄᑦ ᓄᓇᓯᐅᑎᑯᑖᒃᓴᐅᑉ ᐊᖅᑯᑎᑯᑖᒃᓴᖓᓂᑦ ᐊᒻᒪ ᑐᒃᓯᕋᖅᑕᐅᓯᒪᔪᑦ ᐊᕙᑎᒥ ᐸᓚᐅᒪᑎᑦᑎᓇᓲᑎᓄᑦ ᖃᐅᔨᓴᖅᐸᓪᓕᐊᖏᓐᓇᕈᑎᓄᓪᓗ.

ᐹᕙᓐᓛᓐᑯᑦ ᑐᓴᖃᑎᒌᒍᑎᖃᐃᓐᓇᖃᑦᑕᖅᓯᒪᔪᑦ ᐸᕐᓇᐅᑎᖏᓐᓂᒃ ᐱᕙᓪᓕᐊᑎᑕᐅᓂᒃᓴᖓᓄᑦ ᐃᒃᐱᑭᑦᑐᕐᔪᐊᓄᑦ ᓄᓇᓯᐅᑎᑯᑖᒃᓴᐅᑉ ᐊᖅᑯᑎᑯᑖᒃᓴᖓ ᑕᐃᒪᙵᓂᑦ ᐊᖏᖅᑕᐅᓚᐅᖅᑎᓪᓗᒍ 2012-ᒥ. ᒫᓐᓇᕋᑖᖅ, ᐹᕙᓐᓛᓐᑯᑦ ᑐᓴᖅᑎᑦᑎᓯᒪᔪᑦ ᓄᓇᓕᖕᓂ ᓄᑖᙳᕆᐊᖅᓯᒪᔪᓂᒃ ᐊᒃᑐᐊᔪᓄᑦ ᐃᒃᐱᑭᑦᑐᕐᔪᐊᓄᑦ ᓄᓇᓯᐅᑎᑯᑖᒃᓴᐅᑉ ᐊᖅᑯᑎᑯᑖᒃᓴᖓᓄᑦ ᑐᓚᒃᑕᕐᕕᒃᓴᖓᓄᓪᓗ, ᐊᒻᒪ ᑲᑎᒪᖃᑎᖃᖃᑦᑕᐃᓐᓇᖅᖢᑎᒃ ᑖᒃᑯᓂᖓ ᐱᖁᑎᕐᔪᐊᓪᓗᐊᑕᓄᑦ ᐱᓕᕆᐊᒃᓴᐅᔪᑦ ᑲᔪᓯᖁᓪᓗᒋᑦ ᓴᓇᔭᐅᓂᒃᓴᖓᓄᑦ ᐊᐅᓚᓂᒃᓴᖓᓄᓪᓗ (ᐊᒥᐊᒃᑰᓕᖅᑐᑦ ᐱᓕᕆᓃᑦ ᑖᒃᑯᓄᖓᓪᓚᑦᑖᖅ ᐱᔪᓐᓇᐅᑏᑦ ᐱᔭᐅᒍᑎᒃ, ᑮᓇᐅᔭᖃᕈᓐᓇᖅᓯᒍᑎᒡᓗ ᐊᒻᒪ ᐹᕙᓐᓛᓐᑯᑦ ᑲᑎᒪᔨᖏᑦ ᓴᓇᔭᐅᓂᒃᓴᖓᓄᑦ ᐃᓱᒪᓕᐅᕋᔭᖅᑐᑦ).

ᑭᓱᑦ ᐊᖏᖅᑕᐅᔭᕆᐊᖃᖅᐸᑦ ᐃᒃᐱᑭᑦᑐᕐᔪᐊᓄᑦ ᓄᓇᓯᐅᑎᑯᑖᒃᓴᐅᑉ ᐊᖅᑯᑎᑯᑖᒃᓴᖓ ᑲᔪᓯᖁᓪᓗᒍ?

ᓄᓘᔮᖕᓂ ᐱᓕᕆᐊᖅ, ᐱᖃᓯᐅᑎᓪᓗᒍ ᐃᒃᐱᑭᑦᑐᕐᔪᐊᓄᑦ ᓄᓇᓯᐅᑎᑯᑖᒃᓴᐅᑉ ᐊᖅᑯᑎᑯᑖᒃᓴᖓ, ᐊᖏᖅᑕᐅᓚᐅᖅᓯᒪᒧᖅ ᑭᖑᓂᐊᒍᑦ ᐊᕙᑎᓕᕆᓂᕐᒧᑦ ᕿᒥᕐᕈᔭᐅᓚᐅᖅᑎᓪᓗᒍ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂ, ᓴᖅᑮᓪᓗᑎᒃ ᐅᔭᕋᖕᓂᐊᕈᓐᓇᐅᑎ 005 ᑐᓂᔭᐅᓪᓗᓂ 2012-ᒥ. ᐅᔭᕋᖕᓂᐊᕈᓐᓇᐅᑎ ᐱᔾᔪᑕᐅᓯᒪᔪᖅ 5-ᓄᑦ ᐋᖅᑭᒋᐊᕈᑎᓄᑦ ᐅᓪᓗᒥᒧᑦ ᐊᒻᒪ ᐱᖃᓯᐅᔾᔨᓯᒪᓪᓗᓂ ᐅᖓᑖᓂ 189 ᑕᐃᒎᓰᕐᓄᑦ ᒪᓕᒋᐊᓕᖕᓄᓪᓗ ᐋᖅᑭᒃᓯᒪᔪᑦ ᐸᓚᐅᒪᑎᑦᑎᓇᓱᖕᓂᕐᒧᑦ ᖃᐅᔨᓴᖅᐸᓪᓕᐊᖏᓐᓇᕐᓂᕐᒧᓪᓗ ᐊᕙᑎᒧᑦ ᐊᒃᑐᐃᓂᐅᑐᐃᓐᓇᕆᐊᓕᖕᓄᑦ ᓇᓗᓇᐃᖅᑕᐅᓯᒪᔪᑦ ᐃᓄᓕᒫᑦ ᕿᒥᕐᕈᓂᖏᑦᑎᒍᑦ ᑲᔪᓯᓂᐅᔪᓂ. ᐊᒥᓱᑦ ᐊᑐᓕᖅᑎᑕᐅᓪᓚᑦᑖᖅᓯᒪᔪᑦ ᐊᒻᒪ ᑖᒃᑯᓄᖓᓪᓚᑦᑖᖑᙱᑦᑑᒐᓗᐊᖅ ᐃᒃᐱᑭᑦᑐᕐᔪᐊᓄᑦ ᓄᓇᓯᐅᑎᑯᑖᒃᓴᐅᑉ ᐊᖅᑯᑎᑯᑖᒃᓴᖓᓄᑦ. ᐹᕙᓐᓛᓐᑯᑦ ᐊᖏᖃᑎᒌᒍᓯᐅᖅᓯᒪᖕᒥᔪᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐱᕚᓪᓕᕈᑎᒃᓴᓄᓪᓗ ᐊᖏᕈᒻᒥᒃ ᐊᒻᒪ ᓄᓇᒥᒃ ᐊᑐᖅᑐᐊᕐᓂᕐᒧᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ 2013-ᒥ

ᐱᓪᓗᐊᑕᑦ ᒐᕙᒪᒃᑯᓐᓂ ᐊᖏᖅᑕᐅᔭᕆᐊᓖᑦ ᑲᔪᓯᖁᓪᓗᒍ ᐃᒃᐱᑭᑦᑐᕐᔪᐊᓄᑦ ᓄᓇᓯᐅᑎᑯᑖᒃᓴᐅᑉ ᐊᖅᑯᑎᑯᑖᒃᓴᖓ ᑐᓂᔭᐅᓯᒫᓂᓕᖅᑐᑦ ᒐᕙᒪᑐᖃᒃᑯᓐᓂ ᐱᔪᓐᓇᐅᑎᓕᖕᓂ, ᐱᖃᓯᐅᑎᓪᓗᒍ ᐅᔭᕋᖕᓂᐊᕈᓐᓇᐅᑎ ᓈᓴᐅᑖ 005 (2012), ᐋᖅᑭᒋᐊᕈᑎ ᓈᓴᐅᑖ 1 ᑖᒃᑯᓇᙵᑦ ᕿᑭᖅᑖᓘᑉ ᐅᐊᖕᓇᖓᓂ ᓄᓇᐃᑦ ᐊᕕᒃᑐᖅᓯᒪᔪᑦ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑏᑦ (2024), ᖃᓄᐃᑦᑑᓂᖓ ᐃ ᐃᒥᕐᒧᑦ ᓚᐃᓴᓐᓯ (2013), ᒪᓕᒃᑕᐅᔭᕆᐊᓕᒃ ᑐᓂᔭᐅᓯᒪᔪᖅ ᑯᐃᓐ ᑭᒡᒐᖅᑐᐃᔨᖏᑕ ᑲᑎᒪᔨᖏᓐᓂᑦ (2013). ᐊᒥᓲᙱᑦᑐᑦ ᐱᓕᕆᐊᓄᓪᓚᑦᑖᖅ ᐱᔪᓐᓇᐅᑏᑦ ᐱᔭᐅᔭᕆᐊᓖᑦ ᓴᓇᓯᒋᐊᖅᑳᖅᑎᓐᓇᒋᑦ ᐃᒃᐱᑭᑦᑐᕐᔪᐊᓄᑦ ᓄᓇᓯᐅᑎᑯᑖᒃᓴᐅᑉ ᐊᖅᑯᑎᑯᑖᒃᓴᖓ, ᐱᖃᓯᐅᑎᓪᓗᒋᑦ ᐊᖏᖅᑕᐅᓂᖓ ᓴᓇᔭᐅᓂᖓ ᓄᓇᓯᐅᑎᑯᑖᒃᓴᐅᑉ ᐊᖅᑯᑎᑯᑖᒃᓴᖓ ᑖᒃᑯᓇᙵᑦ ᑲᓇᑕᒥ ᐃᖏᕐᕋᔪᓕᕆᔨᒃᑯᑦ ᑎᒥᖁᑖᓂᒃ ᐊᒻᒪ ᐱᔪᓐᓇᐅᑏᑦ ᐊᑐᖅᖢᒋᑦ ᐃᖃᓗᓕᕆᓂᕐᒧᑦ ᐱᖁᔭᑦ ᐃᒪᕐᒥᐅᑕᓕᕆᔨᒃᑯᓐᓂ ᑲᓇᑕᒥ. ᓴᓇᔭᐅᓂᖓ ᐃᒃᐱᑭᑦᑐᕐᔪᐊᓄᑦ ᓄᓇᓯᐅᑎᑯᑖᒃᓴᐅᑉ ᐊᖅᑯᑎᑯᑖᒃᓴᖓ ᐱᔾᔪᑎᖃᖅᑐᖅ ᑮᓇᐅᔭᖃᖅᑎᑕᐅᓂᕐᒧᑦ ᐊᒻᒪ ᑭᖑᓪᓕᖅᐹᖅᓯᐅᑎᒥᒃ ᐃᓱᒪᒃᓴᖅᓯᐅᕈᑕᐅᑦᑎᐊᕐᓗᓂ ᐹᕙᓐᓛᓐᑯᓐᓂᑦ.

ᖃᖓ ᓴᓇᔭᐅᓯᒋᐊᕋᔭᖅᐸ ᐃᒃᐱᑭᑦᑐᕐᔪᐊᓄᑦ ᓄᓇᓯᐅᑎᑯᑖᒃᓴᐅᑉ ᐊᖅᑯᑎᑯᑖᒃᓴᖓ?

ᓴᓇᔭᐅᓂᒃᓴᖓᑕ ᐱᒋᐊᕐᕕᖓ ᐅᓪᓗᖅ ᒪᓕᑐᐃᓐᓇᖅᑐᑦ ᖃᖓᒃᑯᑦ ᑐᓂᔭᐅᓇᔭᕐᒪᖔᑕ ᐱᓕᕆᐊᓄᓪᓚᑦᑖᖅ ᒪᓕᒐᓕᕆᓂᕐᒥᑦ ᐊᖏᖅᑕᐅᔾᔪᑎᓂᒃ, ᐱᖃᓯᐅᑎᓪᓗᒍ ᐊᖏᖅᑕᐅᓂᒃᓴᖓ ᓴᓇᓂᕐᒧᑦ ᓄᓇᓯᐅᑎᑯᑖᒃᓴᐅᑉ ᐊᖅᑯᑎᑯᑖᒃᓴᖓ ᑲᓇᑕᒥ ᐃᖏᕐᕋᔪᓕᕆᔨᒃᑯᑦ ᑎᒥᖁᑖᓂᑦ, ᐊᒻᒪ ᑮᓇᐅᔭᖃᖅᑎᑕᐅᔪᓐᓇᕐᓗᓂ ᐱᓕᕆᐊᖅ. ᒫᓐᓇ ᓇᓚᐅᑦᑖᖅᑕᐅᓯᒪᔪᖅ ᕿᓚᒻᒥᐅᓛᖑᔪᓐᓇᖅᑐᑦ ᐅᓪᓗᖅ ᓴᓇᔭᐅᓂᒃᓴᖓᓄᑦ ᐱᒋᐊᓕᖅᑎᓪᓗᒋᑦ ᐱᖓᔪᒋᓕᖅᑕᖏᑦ ᑕᖅᑮᑦ ᐱᖓᓱᑦ 2025-ᒥ. ᓴᓇᔭᐅᓂᒃᓴᖓ ᐃᒃᐱᑭᑦᑐᕐᔪᐊᓄᑦ ᓄᓇᓯᐅᑎᑯᑖᒃᓴᐅᑉ ᐊᖅᑯᑎᑯᑖᒃᓴᖓ ᐱᒋᐊᔾᔮᙱᑦᑐᑦ ᑭᓯᐊᓂ ᐱᔭᐅᔭᕆᐊᖃᖅᑐᓗᒃᑖᑦ ᐱᓕᕆᐊᓅᖓᓪᓚᑦᑖᖅᑐᑦ ᐱᔪᓐᓇᐅᑏᑦ ᑐᓂᔭᐅᓯᒪᓕᕈᑎᒃ.

ᑭᓱᑦ ᐸᓚᐅᒪᑎᑦᑎᓇᓲᑏᑦ ᐊᑐᓕᖅᑎᑕᐅᕙᓪᓕᐊᕙᑦ ᐊᒃᑐᐃᓗᐊᖁᓇᒋᑦ ᑐᒃᑐᓂᒃ (ᐊᓯᖏᓐᓂᓗ ᓂᕐᔪᑎᓂᒃ)?

ᐹᕙᓐᓛᓐᑯᑦ ᐃᓚᓕᐅᔾᔨᓯᒪᔪᑦ ᑐᒃᑐᐃᑦ ᐃᑳᕐᕕᖏᓐᓂᒃ ᐊᓯᖏᓐᓄᓪᓗ ᑐᒃᑐᐃᑦ ᓴᐳᔾᔭᐅᓯᒪᔾᔪᑎᖏᓐᓄᑦ ᓴᓇᐅᒪᓂᖓᓄᑦ ᐃᒃᐱᑭᑦᑐᕐᔪᐊᓄᑦ ᓄᓇᓯᐅᑎᑯᑖᒃᓴᐅᑉ ᐊᖅᑯᑎᑯᑖᒃᓴᖓᓂ. ᓇᓃᓐᓂᖏᑦ ᑖᒃᑯᐊ ᐃᑳᕐᕖᑦ ᓇᓗᓇᐃᖅᑕᐅᓯᒪᔪᑦ ᑐᓴᕋᓱᐊᖅᓯᒪᓪᓗᑎᒃ ᐃᓄᖕᓂᑦ ᐊᒻᒪ ᓇᓗᓇᐃᖅᑕᐅᒃᑲᓐᓂᕐᓂᐊᖅᑐᑦ ᓴᓇᔭᐅᓯᒋᐊᖅᑳᖅᑎᓐᓇᒋᑦ. ᓇᓃᓐᓂᖏᑦ ᐊᒻᒪᓗ/ᐅᕝᕙᓘᓐᓃᑦ ᖃᔅᓯᐅᓂᖏᑦ ᑐᒃᑐᐃᑦ ᐃᑳᕐᕕᖏᑦ ᐋᖅᑭᒋᐊᖅᑕᐅᓂᐊᖅᑐᑦ, ᑕᐃᒪᐃᑦᑕᕆᐊᖃᕈᑎᒃ, ᑐᙵᕕᒋᓪᓗᒋᑦ ᑲᑎᒪᖃᑎᖃᖃᑦᑕᐃᓐᓇᕐᓃᑦ ᕿᑭᖅᑖᓘᑉ ᐅᐊᖕᓇᖓᓂ ᓄᓇᖃᖅᑐᓂ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᑐᖅᑕᐅᓪᓗᑎᒃ ᐅᔭᖃᖕᓂᐊᕐᓂᓕᒫᖏᓐᓂ ᓄᓘᔮᖕᓂ ᐱᓕᕆᐊᖅ. ᔮᓄᐊᕆ 2014-ᒥ ᐹᕙᓐᓛᓐᑯᑦ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑲᑐᔾᔨᓪᓗᑎᒃ ᓴᖅᑮᓯᒪᔪᑦ ᓄᓘᔮᖕᓂ ᑐᒃᑐᐃᑦ ᓴᐳᔾᔭᐅᓯᒪᔾᔪᑎᖏᓐᓂᒃ, ᐃᓚᓕᐅᔾᔭᐅᓯᒪᓪᓚᑦᑖᖃᑦᑕᐃᓐᓇᖅᑐᑦ ᐱᓕᕆᐊᒥ’ ᓄᓇᐅᑉ ᐊᕙᑎᖓᓂ ᐸᓚᐅᒪᑎᑦᑎᓇᓲᑎᓄᑦ ᐊᒻᒪ ᖃᐅᔨᓴᖅᐸᓪᓕᐊᖏᓐᓇᕐᓂᕐᒧᑦ ᐸᕐᓇᐅᑎᓄᑦ (ᓴᖅᑭᑕᐅᓯᒪᔪᑦ ᒪᓕᒃᖢᑎᒃ ᐅᔭᕋᖕᓂᐊᕈᓐᓇᐅᑎᒥᒃ). ᓄᓘᔮᖕᓂ ᑐᒃᑐᓂᒃ ᓴᐳᔾᔨᓯᒪᓪᔪᑏᑦ ᐱᔪᒥᓴᖅᑕᐅᓯᒪᔪᑦ ᐱᕙᓪᓕᐊᑎᑕᐅᑎᓪᓗᒋᑦ ᓇᓗᓇᐃᔭᑦᑎᐊᖅᓯᒪᒧᑦ ᑐᒃᑐᓄᑦ ᓄᓇᙳᐊᓕᐊᖑᓯᒪᔪᑦ ᕿᑭᖅᑖᓘᑉ ᐅᐊᖕᓇᖓᑕ ᓄᓇᖁᑖᓂ ᐊᒻᒪ ᓇᓗᓇᐃᔭᖅᑕᐅᓪᓗᑎᒃ ᐱᓕᕆᐊᒥᓪᓚᑦᑖᖅ ᓴᐳᔾᔭᐅᓯᒪᕝᕕᐅᔪᑦ, ᐱᔾᔪᑕᐅᑐᐃᓐᓇᕆᐊᓖᑦ ᖄᒃᑲᓐᓂᐊᒍᑦ ᑐᕌᒐᕆᔭᐅᔪᑦ ᐸᓚᐅᒪᑎᑦᑎᓇᓲᑏᑦ. ᐃᒃᐱᑭᑦᑐᕐᔪᐊᓄᑦ ᓄᓇᓯᐅᑎᑯᑖᒃᓴᐅᑉ ᐊᖅᑯᑎᑯᑖᒃᓴᖓ ᐱᔾᔪᑕᐅᓂᐊᖅᑐᑦ ᓇᓕᐊᖕᓄᓪᓚᑦᑖᖅ ᐃᓱᒪᓕᐅᕐᓂᕐᒧᑦ ᐋᖅᑭᒃᑕᐅᓯᒪᔪᓂᒃ ᐃᓚᖏᑦ ᐱᓕᕆᓃᑦ ᓲᕐᓗ ᖃᒐᖅᑎᑦᑎᖃᑦᑕᕐᓃᑦ, ᐊᑦᑎᓈᓗᐊᖅᑐᑦ ᖁᓕᒥᒎᑦ, ᐊᒻᒪ ᐊᑐᖅᑕᐅᓂᖓ ᓄᓇᓯᐅᑎᑯᑖᒃᓴᐅᑉ ᐊᖅᑯᑎᑯᑖᒃᓴᖓ ᓴᓇᔭᐅᓂᕐᒥᒃ ᐱᔾᔪᑎᖃᖅᖢᑎᒃ ᓄᖅᑲᖅᑎᑕᐅᖃᑦᑕᕐᓂᐊᖅᑐᑦ ᑐᒃᑐᐃᑦ ᖃᓂᓗᐊᓕᕌᖓᑕ.

ᑭᓱ ᐸᓚᐅᒪᑎᑦᑎᔾᔪᑎᑦ ᐊᑐᓕᖅᑎᑕᐅᓯᒪᕙᑦ ᐊᒃᑐᐃᓗᐊᖏᓐᓂᖅᓴᐅᓗᓂ ᐳᔭᕋᕐᒧ ᐃᓯᐊᖅᑭᔾᔪᑏᓂ?

ᐹᕙᓐᓛᓐ ᐃᓚᒃᑲᓐᓂᕐᓂᐊᖅᑕᖓ ᐳᔪᕋᓕᕆᓂᕐᒧᑦ ᐊᐅᓚᑕᐅᔪᖅ ᐃᒃᐱᑭᑦᑐᕐᔪᐊᕐᒧᑦ ᐊᖅᑯᑎᑯᑖᒃᓴᖅ ᐊᒻᒪᓗ ᓴᖅᑭᑦᑎᕙᓪᓕᐊᓪᓗᑎ ᐊᒥᓱᒐᓛᖕᓂ ᐃᓚᓯᓪᓗᑎ ᐳᔪᕋᕐᒧᓪᓗᐊᑕᖅ ᐸᓚᐅᒪᑎᑦᑎᔾᔪᑎᓂ ᑐᕌᒐᖃᖅᖢᑎ ᐃᒃᐱᑭᑦᑐᖅᔪᐊᖅ ᐊᖅᑯᑎᑯᑖᒃᓴᖓᓄ. ᓱᕐᓗ ᐅᑯᐊᓪᓗᐊᑕ ᐳᔪᕋᕐᒧ ᐸᓚᐅᒪᑎᑦᑎᔪᑏᑦ ᐃᓚᐅᔪᑦ:

• ᒪᑐᔭᐃᓐᓇᕆᓗᒋᑦ ᓯᖃᓪᓕᑎᕕᖕᒥ ᐱᓕᕆᓂᐅᔪᑦ ᐅᔭᕋᖕᓂᐊᕐᕕᖕᒥ ᐊᑐᓕᖅᑎᓪᓗᒍ ᐃᒃᐱᑭᑦᑐᕐᔪᐊ ᐊᖅᑯᑎᑯᑖᒃᓴᖓᓂ ᒪᓕᒃᑕᐅᓗᓂ ᐃᒃᓗᕐᔪᐊᕐᓂ.
• ᐊᑐᕐᓗᑎ ᐸᑐᓂ ᐊᒻᒪᓗ ᐳᔫᓗᐊᔾᔭᐃᒃᑯᑏᑦ ᓴᕕᒃᓴ ᓅᑕᐅᓕᕌᖓᒥ ᐅᔭᕋᖕᓂᐊᕐᕕᖕᒥ ᐊᒻᒪᓗ ᐃᒃᐱᑭᑦᑐᖅᔪᐊᖅ ᑐᓚᒃᑕᕕᖓᓂ
• ᑲᔪᓯᓗᑎ ᐊᑐᐃᓐᓇᕐᓗᑎ ᐳᔫᓗᐊᔾᔭᐃᒃᑯᑎᓂ ᑕᐃᑲᓂ ᑲᑎᖅᓱᐃᕕᖕᒥ, ᐃᓚᐅᓪᓗᓂ ᑐᒃᓯᕋᖅᑕᐅᓯᒪᔪᖅ ᐳᔪᓗᐊᔾᔭᐃᒃᑯᑏᑦ ᐅᕝᕙᓗᓐᓂ ᐊᓯᖏᑦ ᓴᐴᓗᑕᐅᔪᓐᓇᖅᑐᑦ.
• ᐅᓯᑲᖅᑕᖅᓗᓂ ᓴᕕᒃᓴᒥ ᐊᖅᑯᑎᑯᑖᒃᑯᑦ ᐊᑐᖏᑦᑐᖅ ᐳᔪᕋᕐᓂ ᐳᔪᕋᐅᕙᓪᓕᐊᔪᑦ ᐊᑯᓐᓂᖓᓂ ᓄᓇᒃᑰᕈᑎᓂ ᐊᒻᒪᓗ ᐊᖅᑯᑖ ᓴᓇᓯᒪᓂᖓ ᐊᑐᖅᑕᐅᓯᒪᓗᓂ ᐊᖅᑯᑎᑯᑖᒃᑯᑦ.

ᑕᒃᑯᐊ ᐳᔪᕋᕐᒧᑦ ᐊᐅᓚᑦᑎᓂᖅ ᐸᓚᐅᒪᑎᑦᑎᓇᓱᖕᓂᕐᒧᑦ ᐱᓚᓪᓕᐊᖏᓐᓇᖅᑐᖅ ᑕᐃᒪᖓ ᖃᐅᔨᕙᓪᓕᐊᓪᓗᑎ ᐃᓕᑦᑎᕙᓪᓕᐊᓪᓗᑎ ᐊᒻᒪᓗ ᐊᑐᖅᖢᑎ ᓴᖅᑭᑦᑎᔪᓂᑦ ᓄᓇᓕᖕᓂ ᓇᖕᒥᓂ ᐳᔪᕋᓕᕆᔩᑦ ᑲᑎᒪᔨᕋᓛᖏᓐᓂ, ᓴᖅᑭᑕᐅᓪᓗᓂ ᐃᓄᖕᓂ ᑭᒡᒐᖅᑐᐃᔨᖃᖅᖢᓂ ᑕᒃᑯᓇᖓ ᑕᓪᓕᒪᓂ ᕿᑭᖅᑖᓗᖕᒥ ᓄᓇᓕᖕᓂ.

ᖃᓄᖅ ᐅᖃᖃᑎᒋᔪᓐᓇᖅᐸᒃᑲ ᐹᕙᓐᓛᓐᑯᑦ ᐊᐱᖅᓱᒃᑲᓐᓂᕈᒪᒍᒪ ᐃᒃᐱᑭᑦᑐᕐᔪᐊᓄᑦ ᓄᓇᓯᐅᑎᑯᑖᒃᓴᐅᑉ ᐊᖅᑯᑎᑯᑖᒃᓴᖓᑕ ᒥᒃᓵᓄᑦ?

ᖃᐅᔨᒋᐊᕐᓂᑐᐃᓐᓇᕐᓄᑦ, ᖃᕆᓴᐅᔭᒃᑯᑦ ᐃᕐᖐᓐᓈᖅᑕᐅᑎᒃᑯᑦ ᑎᑎᕋᕐᓗᑎᑦ ᐅᕗᖓ Contact@baffinland.com. ᐊᑕᖏᖅᓯᒪᔪᓄᑦ ᑎᑎᕋᖅᓯᒪᔪᓄᑦ ᑎᑎᕋᕐᕕᑦᑕ ᑐᕌᕈᑎᖏᓐᓄᑦ ᐅᖄᓚᐅᑎᖏᑕᓗ ᓈᓴᐅᑎᖏᓐᓄᑦ, ᓇᕿᓪᓗᒍ ᐅᕘᓇ.